Caro Hidup Kito....Caro Nabi Kito

Allahu Akbar 3x  ...walillah ilham... Selamat Hari  Rayo Aidil Fitri buek anak-anak dan cucu-cucu  semuo..Lamo dah omak tak online..sojak bulan poso, omak teramatlah sibuk dongan hal-hal keagamaan dan ibadah..maklumlah umur omak makin meningkat..bererti, ajal omak dah tak jauh dah..kek sinun jo..jadi omak konolah melobihkan hal akhirat daripado dunio yang fana ni hah..Bulan puaso lopeh, memang omak tunggu kedatangannyo...macam omak tunggu korang dan cucu-cucu omak balik..riang gombiro omak kerano bulan tu menjanjikan rahmat, penghapusan doso dan jugo diselamekkan dari api nerako..dapek jugak omak sempurnokan puaso sobulan ponuh...iyolah omak dah menopos...mano ado cuti-cuti Malaysia laei? Abah ekau pun serupo...sihat belako dio ..omak tengok lagi sihat daripado sebolumnyo...zahir dan batin.

Yolah...Nihah..Omak nak bagitau korang Si Timah bini Pak Andak Latif ekau yang jual potai kek pasar-pasar malam  dah moninggal 20 Ramadan lopeh...Si Sikin isteri Seman, lat tigo buah rumah daripado rumah omak pun dah ninggal, 2 minggu lopeh arwah Timah poie...duo-duo pasal kanser ...Timah kenser buah dado,Sikin pulak kenser tulang..Mudo-mudo laei dah poie...ini semuo kehendak Allah, nak buek camno? kito hamboNyo...sampai ajal omak pun ikut juo.Takdo sapo-sapo yang kekal di dunio melainkan Allah s.w.t.
Cumo omak risau apasal ramai sangat orang mati dapat kenser?...lelaki sakit kenser paru-paru, tokak, tolo...pompuan pulak barah tetek, pangkal rahim dan macam-macam lagi...Ado yang tak kono ni! Omak terfikir jugak..apasal orang dulu-dulu takdo yang meninggal kerano dek kenser atau barah...mati pasal somput, domam jo...umur pulak sampai 7,80 tahun. Orang sekarang tigo puluh dah kono sakit jantung, darah tinggi,kolesterol tinggi, gout dan macam-macam laeilah! Apo kono,eh?

Jadi omak pun melayarilah....bukan  melayari bahtero dongan abah kau! Itu biasolah...maksud omak internet..Omak cari, omak tanyo kenapo,kenapo,kenapo? Mengalahkan budak universiti buek kajian...bertimbun-timbun fail omak daunlot (download)lah! Akhirnyo omak dapek buat kesimpulan..semuonyo pasal makanan dan gayo hidup! Gayo hidup yang kito amalkan gayo hidup YAHUDI dan NASRANI, bukan  caro hidup yang Rasulullah s.a.w ajarkan, caro hidup ISLAM...
Makan kito, minum kito caro kapir lahanat...takdo bismillah, takdo adab, takdo berkat...Kito makan, setan tumpang samo...kito minum, setan koncingkan dulu..kito beronti hanyo apobilo porut dah termongah-mongah,sondat dongan mentekedarah( kato Ustaz teganu kite yang berjanggut kek internet tu)..Makanan kito bukan halalan toyyibah tapi yang syubahah pun kito tolan...macam mano nak berkat? Jadi, omak nak ingatkan korang...tinggalkan gayo dan caro hidup sosek barek (barat) tu..balik kepado fitrah kito, caro nabi..hidup berkat dan bahagio, takdo laei penyakit-penyakit polik-polik camni!





 Sepekaro laei, poei jumpo doktor kalau sakit...rawat segero sebolum parah...nanti kalu dah berlondir, laki korang cari lain, baru korang nangis macam koling mati laki....padan muko korang! Dahlah dah dokek Zohor ni, omak mintak diri nak ko mosojid dongan abah kau...kirim salam kek laki korang, poluk cium buek cucu-cucu omak...wasalam